Март 20-ниң хүнүнде А. С. Пушкин аттыг ном саңынга Тываның билдингир солуннарының бирээзи «Эне сөзү» солуннуң 35 чыл болган оюнга тураскааткан солун ужуражылга болуп эрткен.
Солуннуң баштайгы номери 1991 ч. январь 1-де чырыкче үнген. Баштайгы редактору Тываның Улустуң чогаалчызы, хоочун журналист Чооду Кара-Күске турган. Ооң соонда кол редактору болуп, Россия Федерациязының культуразының алдарлыг ажылдакчызы, Тыва Республиканың Улустуң чогаалчызы, хоочун журналист Артык Ховалыг ажылдап эгелээн.1992 ч. Тыва Республиканың баштайгы Президентизи Шериг-оол Ооржактың үндүрген чарлыы-биле «Эне сөзү» солун чазак деңнелдиг кылдыр үнүп эгелээн. Чуртка улуг өскерлиишкиннер болуп турза-даа, ол үеде, «Эне сөзү» солуннуң баштайгы үндүрүлгелери чоннуң сонуургалын оттуруп, хөй бижикчилиг солун апарган.
Солунга ажыктыг үндүрүлгелер удаа-дараа үнүп турган: «Чаңчылдарны – салгалга», «Өг-бүле», «Ажыктыг сүмелер», «Буянныг чорук», «Мөңгун ужук» дээш, оон-даа өске. Кижизидилге ажылынга өгбелеривистиң биске арттырып каан чаагай чаңчылдары дыка улуг ужур-дузалыг болганда, өг-бүле тудуп эгелеп турар аныяктарга ажыктыг сүмелер, бажыңга чаагай чемнерни канчаар кылырын, тарыттынып эгелеп чоруур огородчуларга... дээш, оон-даа аңгы амыдыралга чугула материалдарны чырыдып турган.Ужуражылганы А. С. Пушкин аттыг национал ном саңының директору Ирина Эртине ажыдып, ол үеде солун чоннуң иштики сагыш-сеткилин байлакшыдып, арга-дуржулгалыг журналист, чогаалчы Артык Хөм-Оттуковна улуг ажылды кылып турганын демдеглээн.
Ук хемчегге Дээди Хуралдың депутады Аяна Монгуш, Тываның билдингир чогаалчылары: Чооду Кара-Күске, Николай Куулар, Александр Шоюн, Зоя Донгак, Лидия Ооржак, эртемденнер: Людмила Эрдыниева, Наталья Ондар, журналистер Светлана Балчыр, Шончалай Ховалыг, Кызыл хоорайның хоочуннар чөвүлелиниң даргазы Ольга Дамдын, Москва хоорайда «Тыва» деп культура төвүнүң удуртукчузу Урана Иванова солун, уттундурбас сактыышкыннарны чугаалап, байырын чедиргеннер.
Тываның херээжен бир дугаар чогаалчызы Барыкаан Донгак аттыг шаңналга төлептиг болганнар: Лидия Ооржак, Чечена Монгуш, Энерел Ким, Раиса Ондар, Нина Эртине. Оларга авторнуң Москвага чоокта чаа парладып үндүргени “Чонунга алгадыр чолдуг” деп төөгү-нептередиглиг очерк номун белекке бербишаан, шаңналдарны тывыскан.
Хемчегге Тываның Улустуң артизи Анзат Куулар «Эне сөзү» деп ырыны күүсеткен, Тыва Республиканың кадеттер школазының 9-ку клазының өөреникчизи Ай-Мерген Салчак Чооду Кара-Күскениң бижээни «Эне сөзү» деп шүлүүн аянныг номчаан.
«Мөңгүн үем меңээ эргим» деп хоочуннарның ыры-хөгжүм ансамбли чараш ырыларын аалчыларга бараалгаткан. Ырыларның үдекчилери Кертик-оол Данзын, Томас Монгуш.
Тывага херээжен чоннуң сүлде-сүзүүн бедидип, парлалганың эгелекчизи Артык Ховалыг видеохарылзаа таварыштыр ужуражылганың аалчыларынга байыр чедирип, чаагай күзээшкиннерлиг йөрээлдерин дамчыткан.
Ук хемчегге келген кижи бүрүзү “Эне сөзү” солунга хамаарыштыр боттарының үзел-бодалдарын илередип, узун төөгүлүг арыннарны арттырган, солуннуң өөредиглиг, кижизидикчи ужур-утказы делгем, ажыктыг дээрзин үнелеп, ужуражылга солун эрткенин демдеглээн.
