(1946–2004)
Чүмү-биле уран чүүлге бердинген мен,
Артист болган чаяалгам-дыр, чуртталгам-дыр!
Чүрээм көзээн бодалдарым албан бүдер
Ажы-төлүм салгалым бар, күчүм ол-дур!
Х. Ширин-оол.
Тыва чоннуң база бир сураглыг, тускай салым-чаяанныг оглу, Россияның алдарлыг, Тываның Улустуң артизи, Тыва Республиканың Күрүне шаңналының эдилекчизи Хертек Өлбезекович Ширин-оол бөгүн 80 харлаар турган.
Ол 1946 ч. март 7-де ус-шеверлер чурту Бай-Тайга кожууннуң каас чараш чурумалдыг Кара-Хөлге төрүттүнген. Тээли ортумак школазын 1963 ч. дооскаш, ол-ла чылын Ленинградтың театр, музыка болгаш кино институдунга өөренип киргеш, 1968 ч. ону чедиишкинниг дооскан.
Ооң бүгү-ле чогаадыкчы амыдыралының ажыл-ижи Тываның В. Ш. Көк-оол аттыг хөгжүм-шии театрынга эрткен. Хертек Өлбезекович тыва, орус, делегей драматургиязының шилиндек дээн чогаалдарының үжен ажыг кол-кол рольдарын көрүкчүлерниң улуг үнелелин ап, бир-ле тускайлаң ойнап чорааны уттундурбас. Оларның аразындан салым-чаяанныг артистиң сагыш-сеткилинден бердинип ойнааны Кенден-Хуурактың («Хайыраан бот»), Ромеонуң («Ромео биле Джульетта»), Фархадтың («Ынакшыл дугайында тоолчургу чугаа»), Хлестаковтун («Ревизор»), Чиңгис-Хаанның («Чиңгистиң ак булуду»), Субедейниң («Кым сен, Субедей маадыр?») овур-хевирлери тыва театр уран чүүлүнүң төөгүзүнде кажанда-даа эстип читпес, оңмас овур-хевирлер бооп арткан.
База бир көскү кижилерниң бирээзи Хертек Өлбезекович Ширин-оолду амыдыралга тура-соруктуг, туруштуг, негелделиг, чүткүлдүг чораан кижи дээрзин чон билир. Ол Тываның төөгүзүнге, культура, уран чүүлдүң бурунгаар сайзыралынга балалбас исти арттырган.
Алдарлыг артистиң дугайында Тываның Улустуң чогаалчызы М. Кенин-Лопсан мынчаар бедик үнелээн: «Ширин-оол Хертек кажан кезээде, хүндүс боорга, арыг салгын болуп, дүне боорга кыпкан сылдыс болуп көстүп чоруур».
Тываның хөгжүм-шии театрының режиссёру, Россияның алдарлыг артизи Алексей Ооржактың үнелели: «Тываларның база бир чоргааралы, хей аъдының база бир кол символу аът дугайында «Эгил эжим, эгил!» деп легенданы кады, кончуг кыска хуусаада бижидивис. Ажылга бүгү бодун өргүп чорду. Ооң ажылдаарының дүргенин магадап ханмаан мен».
Бодунуң төрээн чурту, чону дээш, бүгү күжүн, билиин, уран чүүлдүң сайзыралынче берип, үргүлчү сагыжы саргып, чоннуң амыдырал-чуртталгазы эки талазынче өскерлип чоруур болзун деп күзел-бодалдарын шүлүктеринде, шиилеринде бижип арттырып каан.
Шылгараңгай улуг актёр Ширин-оол Хертектиң «Бедик арттан харап ора», «Арат-чонум чүрээнде мен», «Силер-биле тыным тудуш» деп номнарын номчуурун сүмелээр-дир бис.
Материалды И. Д. Ооржак белеткээн.
