Тевек оюну чүс-чүс чылдар бурунгаар тыптып келген болгаш бодунуң үезиниң иштинде чоннуң, эң ылаңгыя аныяк өскенниң канчаар-даа аажок сонуургап, салдынмайн ойнаар оюну бооп чораан. Тевек – хөй-хөй чүс чылдарда арат чоннуң ортузунга канчаар-даа аажок нептерээн, бүгү ниитиниң хандыкшылдыг оюну.
Бурунгу тыва тоолдарда «тевектээр» деп сөс таваржып турары тевекти бурун шагдан бээр ойнап чораанының херечизи бооп турар.
Тевекти кончуг тевер кижилер муң ажыр безин чедириптер чораан.
Тевекти тевер кижиниң саны кызыгаар чок болур.
Ойнакчылар чаңгыс-чаңгыс бооп алгаш, азы ийи ийикпе, оон-даа хөй бөлүктер бооп алгаш база ойнаар.Тываның А. С. Пушкин аттыг национал ном саңының чурт-шинчилел чогаалының болгаш национал библиография килдизиниң ажылдакчылары Шагаа байырлалының оюннарының бирээзи «Тевек»деп оюнга мөөрей эрттиргеннер.
Мөөрейге Тываның политехниктиг техникумунуң сургуулдары, Кызылдың эрге-хоойлу болгаш экономика техникумунуң «эрге-хоойлу» салбырының бирги курсчуларының оолдары, Кызылдың Михаил Бухтуев аттыг 1 дугаар школазының 9 «в» клазының оолдары күзелдии-биле киришкеннер.
Тываның политехниктиг техникумунуң сургуулдарының аразындан Ооржак Алдын-Херел, Монгуш Найдан, Соскал Алаш эң-не хөй сан теп ойнааннар, а бир дугаар школадан 9 «в» класстың оолдары Оюн Норбу, Бальчир Сенди, Монгуш Намчыл тиилекчилер санынче кирген.Тевек оюнунга сургуулдар, өөреникчилер идепкейлиг киржип, оюн солун, хөглүг болганынга амырап, четтиргенин илереткеннер.
