Тыва Республиканың А. С. Пушкин аттыг национал ном саңының чурт-шинчилел чогаалының болгаш национал библиография килдизиниң ажылдакчылары Шагаа байырлалынга уткуштур Кызылдың Михаил Бухтуев аттыг 1 дугаар школазының 9 «в» клазынга «Шагаа — ыдыктыг байырлал!» — деп солун, өөредиглиг хемчегни эрттиргеннер.
Шагаа тываларның эң-не ынак байырлалдарының бирээзи, кышты ашканының база час шинчи киргенин демдеглеп эрттирер чаа чылдың байырлалы дээрзин база ёзу-чаңчылдардан: арыгланып-кактаныры, чолукшууру, саң салырының дугайында чугаалап бергеннер. Чолукшуур ёзулалды бот-боттарының аразында чижектерге көргүскенин аажок сонуургааннар.
Ол ышкаш уруглар тыва улустуң аас чогаалының аңгы-аңгы хевирлеринге мөөрейлешкеннер.Тывызыктажырынга, узун тынышка, чылда кирген дириг амытаннар дугайында үлегер домактарны улаштыр чугаалаарынга идепкейлиин көргүскеннер.
Ыдыктыг байырлалывыс Шагаага хамаарышкан ёзу-чаңчылдар дугайында хөйү-биле билип алганынга өөреникчилер өөрүп четтиргенин илереткеннер.
