Тываның А. С. Пушкин аттыг национал ном саңының чурт-шинчилел чогаалы болгаш национал библиография килдизинде Тыва Республиканың алдарлыг башкызы, чогаалчызы чораан Көк-оол Чамыяңның 95 харлаанынга «Көдээ амыдыралдың алгакчызы» деп номнар делгелгези салдынган. Ында ооң бижээн номнары, намдары болгаш ажыл-ижиниң дугайында материалдарны делгээн.

Чамыяң Көк-оол Топуевич 1931 чылдың февраль 5-те ТАР-ның Тес-Хем кожууннуң Орукку-Шынаага төрүттүнген. Чайлаг школазының эге клазынга, Самагалдайның чеди чыл школазынга, Кызылдың башкы училищезинге өөренгеш, Күрүнениң башкы институдунуң төөгү, дыл факультедин дооскан.

1965 чылда «Шын» солунга «Күзел кырывас» деп чечен чугаазы парлаттынган. Баштайгы ному «Чаңгыс аалдың кижилери» (1974) деп чечен чугааларының чыындызы парлалгага көстүп келген. Дараазында чылдарда «Кыштагда чырык» (1977), «Ханы дазыл» (1981), «Часкы хөөннер» (1984), «Мөңгүн оттук» (1998), «Хаяа» (2001) база В. Чукрееваның очулгазы-биле «Кыштагда чырык» («Свет над зимовьем») (1989) деп номнары үнгүлээн.