Дүүн, январь 21-де, А. С. Пушкин аттыг национал ном саңының чурт-шинчилел чогаалы болгаш национал библиография килдизинге Россияның Чогаалчылар Эвилелиниң кежигүнү, ТР-ниң өөредилгезиниң тергиини Меңги Ооржактың «Радион Маадыр-оолович Донгак: уран сөстүң күжү-биле» (төрүттүнгенинден бээр 50 харлаанынга) деп документалдыг монтаж хевиринге үндүрген номунуң таныштырылгазы болуп эрткен.
Ук хемчегге Тываның сураглыг композиторлары, ыраажылары, чогаалчылары, эртемденнери, башкылары болгаш өскелер-даа идепкейлиг киришкен. Ылаңгыя хөөмей-сыгыды-биле Саян ансамблиниң артизи Мөңге Монгуш база «Мөңгүн үем эргим» деп аттыг хоочуннарның ыры бөлүү, баян үделгезинде Кертик-оол Максим, чаа ном таныштырылгазын диргизип, каастакчылары болганнар.
Башкы, шүлүкчү, чашкы шаандан тура амга чедир, эгин кожа эдержип чоруур эжи Менги Ооржак Радион Донгактың номунда амыдырал-чуртталгазының болгаш ажыл-чорудулгазының дугайында сактыышкыннарны чыгганын база мөзү-бүдүжүнүң, эртем сонуургалдарының байлак делгеминиң дугайында чуруктарлыг солун презентация-биле көргүзүп, таныштырганы база бир янзы тода, солун болган.
Радион Донгактың чаңгыс чер-чурттуглары бай-тайгажылар: төөгү эртемнериниң кандидады Мая Салчак, Тываның Улустуң чогаалчызы Лидия Иргит, чогаалчылар Айлаңмаа Тойлу, Тайгана Назынчап, башкызы Бакмаа Маңнай болгаш өскелер-даа белек-селээн сөңнеп «Бай-Талывыстың баштак чаңныг, хүндүлээчел, эртем-номга бердинген, эвилең-ээлдек, энерел сеткилдиг оглунга чоргаарланып чоруур-дур бис» дижип, чылыг-чымчак чечен-мерген йөрээл шүлүктерин номчааннар.
Ол ышкаш билдингир прозачы, журналист Шаңгыр-оол Суваң амгы үеде тыва чогаалда шүгүмчүлелдиг сайгарылга аскап турарын, ол талазы-биле ажылды сайзырадырынга Радион Донгакка бүзүреп, чедиишкиннерни күзээн. «Сылдысчыгаш» уруглар солунунуң редактору, уруглар чогаалчызы Александр Шоюн ооң бүгү талазы-биле чогаал сайгарылгазынга бышкан билиин үнелеп, дузааргак, биче сеткилдиин демдеглээн.
Хемчегге «Уран сөстүң күжү-биле» деп ном делгелгезин килдистиң ажылдакчылары салган. Делгелгеде Радион Донгактың «Чогаалдарны номчуп ора...» деп литература-публицистиг чыындызы болгаш башкы, шүлүкчү Меңги Ооржактың биобиблиографтыг үндүрүлгези база аңгы-аңгы солуннарда, «Башкы», «Улуг-Хем» сеткүүлдеринде чырыттынгылаан элээн хөй сайгарылгалыг, үнелээшкин ажылдары делгеттинген.
Радион Донгак келген аалчыларга, мөгейикчилеринге өөрүп четтиргенин илередип, кыштың чыккылама соогу дивейн, туман-шаңны херекке албайн чедип келгенинге өөрүп база чурт шинчилел килдизиниң ажылдакчыларының ачы-буянын демдеглеп, номунуң таныштырылгазы бедик көдүрлүүшкүннүг эрткенинге четтиргенин илередип, сеткили ханып чугаалаан.
