Декабрь 4-түң хүнүнде Ада-чурт камгалакчыларының база Тиилелгениң 80 чыл оюнга тураскааткан «Номчу, Тыва!» деп ном фестивалынынга чурт-шинчилел чогаалының килдизинге Тускайлаттынган шериг операциязында (ТШО) Ада-чуртун камгалап чоруур Тывавыстың эрес-дидим оолдарынга тураскааткан шүлүктер, чечен чугаалар бижип чоруур чогаалчылар-биле солун ужуражылга болуп эрткен.
Хемчегниң хүндүлүг аалчылары, Россия чергелиг мөөрейлерниң тиилекчилери:
- шылгараңгай күрүне ажылдакчызы, политик, иштики херектер органнарының хоочуну, Тываның Чогаалчылар эвилелиниң Москвада салбырының даргазы Борис Балчий-оол;
- ТР-ның Дээди Хуралдың экономиктиг чөвүлел аппарадының информация-аналитика килдизиниң удуртукчузу, билдингир журналист Юрий Дарбаа;
- очулдурукчу, Тыва Чогаалчылар эвилелиниң болгаш Россияның Журналистер эвилелиниң кежигүнү Чечена Монгуш болган.
@id202536248 Борис Балчий-оол – «Маадырлар болуп төрүттүнмес. Бистиң үе!» («Героями не рождаются. Наши дни!») деп Россия чергелиг төлевилелдиң шилиттинген чечен чугаалар чыындызынның тиилекчизи.
@darbaaa Юрий Дарбааның бижээн «Дирилген чурук» деп чогаалы 2025 чылда Россияның Чогаалчылар эвилелиниң хөй-ниити болгаш федералдыг шажын организациялары-биле кады эрттиргени «Силерниң камгалакчыларыңар, Россия» деп Бүгү-российжи литературлуг мөөрейге «Проза очулгазы» деп бөлүкке II-ги черни алган.
@id533929011 Чечена Монгуш – Тускайлаттынган шериг операциязының дугайында орус-тыва шүлүктер чыындызы «Россия дээш! Тыва дээш!» («Zа Россия! Zа Туву!») деп төлевилелдиң тургузукчузу болгаш деткикчилериниң бирээзи, номда орус чогаалчыларның бижээн шүлүктерин тыва дылче очулдурган.
Чечена Монгуштуң «Россия дээш! Тыва дээш!» («Zа Россия! Zа Туву!») деп орус-тыва шүлүктер бижээн номунуң таныштырылгазы Россияның аңгы-аңгы хоорайларынга болуп эрткен. Ооң дугайында аалчыларга электроннуг хевирге солун кылдыр чугаалап көргүскен.
Хемчегге Тываның Улустуң чогаалчылары Николай Куулар, Шаңгыр-оол Суваң, Лидия Иргит, литература шинчилекчизи, башкы Радион Донгак, чогаалчылар Раиса Чулдум, ЮрийТуң-оол, Чагар-оол Доруун, Тыва Республиканың ТШО-га чок болган маадырларның иелер комитединиң кежигүннери, Кызыл хоорайның аңгы-аңгы школаларының тыва дыл болгаш чогаал башкылары база чогаалчыларның мөгейикчилери идепкейлиг киришкеннер.
Чогаалчылар Россия чергелиг мөөрейлерге бижээн чогаалдарының кол маадырларының дугайында номчукчуларга сонуургадып чугаалааннар. Ук маадырларның авалары оолдарын чогаалдарга мөңгежидип бижип каанынга өөрүп четтиргенин илередип турганнар.
Ук хемчегни каастап, чогаалчыларның маадырларга тураскаадып бижээн шүлүктерин Тываның күрүне универсидединиң башкызы Ч. В. Чыртак-оол, Кызылдың А. А. Алдын-оол аттыг 2 дугаар школазының өөреникчилери Шуру Монгуш, Тамерлан Кунзет аянныг номчааннар.
Хемчегниң төнчүзүнде чогаалчылар, номчукчулар төөгүлүг чурукка тырттырып алганнар.
