Декабрь 4-түң хүнүнде Ада-чурт камгалакчыларының база Тиилелгениң 80 чыл
оюнга тураскааткан «Номчу,
Тыва!» деп ном фестивалынга чурт-шинчилел чогаалының килдизинге Тываның
Улустуң чогаалчызы М. Б. Кенин-Лопсаңның 100 харлаанынга тураскааткан биче хемчээлдиг
проза чогаалдарының тиилекчилери аныяк
чогаалчылар-биле ужуражылга болуп эрткен.
Ужуражылгага Тыва Республиканың чогаалчылар эвилелиниң
баштаар чериниң амгы үеде даргазы, аныяк шүлүкчү, драматург Кежик Конзай, национал школа хөгжүдер
институдунуң тыва филология лабораториязының эргелекчизи Чойгана Сарыглар, Кызылдың 9 дугаар школа-гимназиязының даштыкы дыл
башкызы Мөңгүн-Сай Ондар аалдап
чедип келгеннер.
Хемчегге Тываның Улустуң чогаалчылары Н. Куулар, Л. Иргит,
Тываның гуманитарлыг шинчилелдер институдунуң эртем ажылдакчызы В. Салчак, литература
шинчилекчизи, башкы Р. Донгак, чогаалчылар Р. Чулдум, Ю Туң-оол Тываның күрүне
универсидединиң сургуулдары база филология эртемнериниң кандидады, башкызы Ш. Ю.
Азыраа, Кызыл хоорайның аңгы-аңгы школаларының тыва дыл болгаш чогаал башкылары
база аныяк чогаалчыларның мөгейикчилери киришкеннер.
Ужуражылгага аныяк чогаалчылар канчап чогаал бижип
эгелээнин, мөөрейге бижээн чогаалдары: «Чавага», «Болчаг», «Күзүңгү», оларның кол
маадырлары: Шыдар, Ай-кыс, Хартык-Хам кырган-ачай, Хенче сугларның дугайында чугаалааннар. Чогаалда кол
маадырларның дугайында номчукчулар аажок сонуургап, айтырыгларны катап-катап
аныяк чогаалчыларга салып турганнар.
Ук чогаалдарны номчукчулар хөй кезиинде амгы үениң
аайы-биле интернет четкизинден номчуп алыр ужурга таваржып турар. Ынчангаш бо чогаалдарны ном кылдыр үндүрерин хөй-хөй
номчукчулар дилеп турган.
Аныяк чогаалчыларга Тываның билдингир чогаалчылары
арга-сүмезин кадып, моон-даа соңгаар чогаадыкчы салым-чаяанын сайзырадып,
чаа-чаа чедиишкиннерни, солун чогаалдар немежирин күзээннер.
Бо ужуражылга келген сургуулдарга, номчулгага ынактарга улуг сонуургалды оттуруп, уттундурбас болуп
арткан.
Хемчегниң төнчүзүнде аныяк чогаалчылар, оларның мөгейикчилери
төөгүлүг чурукка тырттырган.
