Ноябрь 12-де, А.С.Пушкин аттыг ном саңының чурт-шинчилел чогаалы болгаш национал библиография килдизиниң ажылдакчызы Чечек Монгуш Кызылдың 2 дугаар ортумак школазының 10 «а», 10 «б» класстарының өөреникчилеринге «Тыва чоннуң чаагай чаңчылдары бо үеде» деп аттыг беседаны база анкетаны эрттирген.
«Чаңчыл дээрге кижи боду-дур. Чер кырынга кандыг-бир чон кажан тывылганыл, ол үеден эгелеп, ол чоннуң өске чоннардан ылгалыр онзагай чаңчылы турар. Чаңчыл болза, чүс-чүс чылдарны ажып эрткен болгаш кандыг-бир чоннуң бодунуң өзүп олурар салгалынга арттырып каан ыдыктыг чагыы болур» - деп, салым-чаяанныг этнограф, сураглыг чогаалчы М.Кенин-Лопсанның «Тыва чоннуң бурунгу ужурлары» деп онзагай номунда бижээн болгай.
Анкета 8 айтырыгдан тургустунган, чижээ: «Улуг кижиниң чугаазын дыңнаар, үзе кирбес. Отче хирлиг чүүл октавас...».
Бо чаңчылдарны сагып чоруур сен бе? – деп мындыг хевирлиг айтырыглардан тургустунган.
Өөреникчилер беседаны улуг сонуургал-биле дыңнааш, айтырыгларга идепкейлиг харыылааннар.
