Хүндүлүг номчукчулар!

Төрээн ие дылывыстың хүнү-биле А. С. Пушкин аттыг национал ном саңының мурнундан силер бүгүдеге изиг байырывыс чедирип тур бис!

Тыва дыл хүнүн, тыва чоннуң культурлуг болгаш сагыш-сеткил өнчү-байлаа болур тыва дылывысты кадагалап база сайзырадыр сорулга-биле, 2016 ч. эгелеп, Тыва Республиканың Чазааның чарлыын ёзугаар демдеглеп, эрттирип эгелээнден бээр, Ноябрь 1 – тыва чоннуң база бир улуг байырлалы болу берген. Бо хүннү тургузар дугайында эгелекчи саналды Улустуң чогаалчызы, шүлүкчү А. А. Даржай киирген.

Кандыг-даа омак-сөөктүг кижиниң дээди чоргааралы ооң төрээн дылы болур.

Бистиң мерген угаанныг өгбелеривистиң чүс-чүс чылдар дургузунда аралажып, чугаалажып, ажыглап келген дылы, үе-шагның дошкун аажызынга-даа алыспайн, бо хүннерге чедир бүдүн-бүрүнү-биле дамчып чедип келгенинге чоргаарланмас аргавыс чок.

База катап төрээн дылывыстың байырлалы – Тыва дыл хүнү-биле! Ыдыктыг төрээн дылывыстың үнези кезээде бедик болуп, ажы-төлүвүс-биле үргүлчү тыва дылга чугаалажып тураалыңар. «Чоннуң өлүм чок быжыг туруштуу ооң төрээн дылында» деп сураглыг чогаалчы Ч. Айтматов чугаалаан болгай.

Өске бүгү дылдар-биле бир дөмей эң-не чараш, эң-не байлак, эң-не чечен-мерген тыва дылывыс кезээ шагда читпес болзун деп йөрээдивис!

Төрээн дылын билбес болза,

Төрел чондан хоорлур апаар.

Орус дылды билбес болза,

От дег чырык көрбес болур.

Ынчангаштың ийи дылды

Ылап билзе чоргаар чоруур. (А. Арапчор)

Хүндүткел-биле, А. С. Пушкин аттыг Национал ном саңының удуртукчузу Эртине И. А.