Сентябрь 11-ниң хүнүнде, А. С. Пушкин аттыг национал ном
саңынга, Улуг Тиилелгениң 80 чыл оюнга тураскаадып, бижиттинген «Чоннуң чагыын күүсеткен «Танкист» деп
төөгүлүг номнуң таныштырылгазы болуп эрткен. Номну Тыва Республиканың
культуразының тергиини, ыраажы, композитор А. М. Арат-оол база Тываның Улустуң
чогаалчызы Н. Ш. Куулар бижээн.
Номнуң кол маадыры - Ада-чурттуң Улуг дайынының
киржикчилери он бир тыва танкистерниң бирээзи,ажыл-ишке ынак, тура-соруккур эки
турачы Түлүш Самбууевич Нурсат. Түлүш Самбууевич Нурсат 1917 чылдың май 15-те
Ѳвүр кожууннуң Дус-Даг сумузунга тѳрүттүнген. Нурсат чашкы чылдарында малчын ада-иезиниң
мал-маганын кадарып, Дус-Дагның Торгалыг деп хемге эштип, үе-чергези оолдар-биле
ойнап, хүрежип өзүп келген.
Нурсат баштай Шагаан-Арыгга трактор башкарар мергежилге
ѳѳренип алгаш, Элегеске ажылчын намдарын эгелээн.
1938 чылда Тываның революсчу шериинче келдирткен.
1941-1943 чылдарда улуг командирлер школазын дооскаш, лейтенант эргени алгаш,
полк танк взводун командирлеп ажылдап турган. 1943 чылдың май 20-де Ада-чурттуң
Улуг дайынынче тыва эки турачы танкистер-биле аъттаныпкан... Фашистиг Германияны совет чон 1945 чылдың май 9-та чылча
шапкаш, тиилээн.
«Чоннуң чагыын
күүсеткен «Танкист» деп номнуң
таныштырылгазынга Кызылдың эрге-хоойлу болгаш
саң-хөө техникумунуң сургуулдары болгаш башкызы С. Аракчаа, А. С. Пушкин аттыг
национал ном саңының директору И. А. Эртине, Тываның билдингир чогаалчылары Ш.
М. Суваң, А. С. Шоюн, А. С. Ондар, Б. К. Балчий-оол, А. Б. Конгар база танкист Оюн
Бортуй-оолдуң уруу З. Б. Икрамова, хөй чылдарда Тываның орук эргелелин удуртуп
чораан С. С. Санаа, танкист Т. С. Нурсаттың оглу Хөвең-оолдуң уруглары болгаш
өске-даа салгалдары танкистиң дугайында сактыышкыннарны чоргаарал-биле чугаалап
турганнар.
Ук хемчегниң идепкейлиг киржикчилери Кызылдың башкы колледжиниң доозукчузу,
тренер - башкы Э. Ооржак Россияның болгаш Дагестан Республиканың шылгараңгай
чогаалчызы Р. Гамзатовтуң «Дуруяалар» деп шүлүүн аянныг номчаан, оон ыңай автор
А. М. Арат-оол «Дөрт Түлүш, чаңгыс Донгак» деп ырызын келген аалчыларга
бараалгаткан. Номнуң таныштырылгазы өөредиглиг болгаш солун болуп эрткен.
