Хүндүлүг башкылар, ада-иелер, эргим уруглар! Билиглер хүнү-биле, чаа өөредилге чылы-биле А. С. Пушкин аттыг Национал ном саңының мурнундан силерге байырывыс чедирип тур бис!
Билиглер хүнү – эң-не байырланчыг, онзагай хүн.1984 ч. июнь 15-те Совет Эвилелиниң Дээди Совединиң Президиумунуң үндүрген чарлыы-биле сентябрь 1-ни бүгү чоннуң байырлалы – Билиглер хүнү кылдыр чарлаан.
Бо хүнде республиканың бүгү школаларынга чаа өөредилге чылының эгелээни-биле каас-шиник кеттинген, холдарында өң-баазын чечектер туткулаан өөреникчилерлиг байырлыг чыскаалдар, тайбың кичээлдери болгаш эртем-билигге тураскааткан класс шактарын эрттирери чаңчыл болу берген.
Бирги классчыларга, оларның ада-иелеринге эң-не уттундурбас база бир кайгамчык хүн. Олар бир-ле дугаар школаҗе эге базымны кылып, «Өөреникчи» деп чаа чараш аттың эдилекчилери болуп, эртем-билигниң сүүзүнүн чедип алырының чугула делгем оруунче углаар, бот-тускайлаң амыдыралче шымнып кирер хүнү.Ол ышкаш өөреникчи бүрүзүнге чайгы дыштанылга соонда, үрде манааны, аас-кежиктиг хүнде, чаңгысклассчылары-биле, башкылары-биле уҗураҗыры чырык өөрүшкү.
Эргим башкылар, ада-иелер, сургуулдар болгаш өөреникчилер, чымыштыг, харыысалгалыг ажыл-ижиңерге, өөредилгеңерге чогаадыкчы чедиишкиннерни күзедивис!
Силерге А. С. Пушкин аттыг Национал ном саңының эжии кезээде ажык.
