Чурт-шинчилел чогаалы болгаш национал библиография килдизиниң ажылдакчылары «Чылыг сөстүң одаа» деп бөлгүмнүң ээлчээн ёзугаар, август 22-ниң хүнүнде, «Аас чогаал – Тыва культураның өндүр бедии» деп аттыг хемчегни Кызылдың кырганнар болгаш инвалидтер дазылга бажыңынга эрттиргеннер.
Ужуражылганы байыр чедириишкини-биле Тываның улустуң хөөмейжизи, Тыва Республиканың алдарлыг артизи, Тыва үндезин культура төвүнүң директору Игорь Көшкендей ажыткан. Ол игилге ойнавышаан, хөөмейни уяранчыг кылдыр күүсеткен.
Дараазында РФ-тиң Президентизи В. Путинниң «Культура болгаш уран чүүлдүң аныяктары» деп шаңналының эдилекчизи, Тыва үндезин культура төвүнүң директорунуң оралакчызы Меңги Васильевна Ондар «Тыва улустуң аас чогаалы» деп электроннуг презентацияны көргүскен. Хоочун номчукчуларывыс аас чогаалының эргижирээн хевири «Хартыгалаар» деп кыска кинону онзалап демдеглээннер.Ужуражылганы уламчылап, Тыва үндезин культура төвүнүң хөөмейжизи Норбу Салчак хөөмей-сыгыдын бараалгаткан.
Тывызыктарга болгаш кожамыктарга мөөрейлешкен түңнелинде, мѳзү-бүдүштү хевирлээр, сагыш-сеткилди байыдар, шак мындыг ажыктыг, шынарлыг хемчеглер мооң-биле кызыгаарланмазын деп номчукчулар демдеглеп, өөрүп четтиргенин илереткеннер.
Ук хемчегниң төнчүзүнде РФ-тиң кадык-камгалалының тергиини, ТР-ниң Чогаалчылар эвилелиниң кежигүнү Раиса Ховалыг солун угаадыгларны номчуп бергеш, бодунуң ыры апарган шүлүү «Чедер хөлүмнү» баянга ырлап күүсеткен.
