Бай-Тайга
кожууннуң Улустуң чогаалчызы, шүлүкчү, прозачы, «Мөңгүлек» чечен чогаал, ыры-хөгжүм
каттыжыышкынының хоочун кежигүнү Светлана Иргитовна Самбый-оолдуң шүлүктер болгаш
кыска тоожу чыындызы «ЧАРАШ-ДАЖЫМ» деп аттыг чаа ному чырыкче үнген.
Светлана
Иргитовна 1955 чылдың февраль 3-те Бай-Тайга кожууннуң Шуй сумузунга малчын
өг-бүлеге төрүттүнген. Чогаалга сонуургалы школачы чылдарындан эгелээн. «Төнмес
агым» (2001), «Ачылыг час» (2005) деп шүлүк номнарының автору.
Ол Сүт-Хөл, Бай-Тайга кожууннарның
комсомол комитеттеринге, херээженнер чөвүлелдеринге, партком секретарынга, культура
килдизинге, кожууннуң тус чер Хуралының секретарынга база архив эргелекчилеп,
хөй чылдарда ажылдап келген хөй-ниитичи. Амгы үеде Бай-Тайга кожууннуң
ус-шеверлерниң «Байлак өнчү» музейиниң эргелекчизи болуп ажылдап турар. Чогаалчы
эш-өөрлери-биле төрээн чериниң чараш бойдузун сонуургап, тайгаларынче туристеп
чоруурунга ынак. Кызымаккай ажыл-ижи дээш, ол Чазактың хөй шаңналдарынга
төлептиг болган: «Тыва Республиканың алдарлыг ажылдакчызы» (2004), «Тыва
Республиканың культуразының тергиини» (2025), «Тыва Республиканың уран чүүлүнүң
тергиин хоочуну» (2025).
«ЧАРАШ-ДАЖЫМ»
– авторнуң шилинди база чаа шүлүктериниң чыындызы. Автор бо номнуң даштында
ыяшта бижиктерни Чараш-Даш тайгазынга 2010 чылда үндүрүп аскан кижилерниң
бирээзи.
Чыынды «Сеткил өөртүр чараш бойдус черивисте», «Чуртум биле
чонум кончуг», «Өндүр өгбелерим, өрегелиг өөм, өлчейлиг өг-бүлем», «Уран
чүүлден чалгынналгаш...», «Чыннып чораан шырайларым одаглары», «Амыдырал
аагын-кээгин арыды чуп, аштап каапса...» деп кезектерден тургустунган. «Проза»
деп кезээнде авторнуң калбак чогаалга бижээни «Орус-Көк» деп барымдаалыг тоожузу
номчукчунуң сонуургалын оттурар.
Номну башкы, чогаалчы, очулдурукчу Меңги Ооржак, башкы, чогаал сайгарыкчызы Радион Донгак чыып
тургускаш, редакторлаан.
Автор бодунуң мурнундан Бай-Тайга кожууннуң чагыргазынга база
культура эргелелинге номун чырыкче
парлап үндүрерин деткээни дээш, четтиргенин
илередип тур.
Национал ном саңының коллективи Светлана Иргитовнага изиг
байыр чедирип, демир-үжүү ылгын болзун деп йѳрээп, чаа-чаа чогаалдар ам-даа
бижиттинерин күзеп тур!
Хүндүлүг номчукчулар! Чаа номну Национал ном саңының чурт-шинчилел
чогаалы болгаш национал библиография килдизинге кээп, сонуургап номчуп болур
силер.
