А. С. Пушкин аттыг национал ном саңынга чурт-шинчилел чогаалы болгаш национал библиография килдизиниң ажылдакчылары, июнь 23-түң хүнүнде, «Чылыг сөстүң одаа» деп бөлгүмнүң ээлчеглиг ажылынга Тываның уруглар чогаалчызы Александр Саң-оолович Шоюн база аныяк шүлүкчү Светлана Алексеевна Ондар-биле ужуражылганы эрттирген.
Чогаалчылар боттарының канчап бичии уругларга чогаалдар бижий бергенин, чүү деп номнары чырыкче үнгүлээнин уругларга сонуургадып чугаалап берген. Ол ышкаш уруг бүрүзүнге “Сылдысчыгаш” солунун белекке берген.
Ужуражылганы сонуургап келгеннерден Тываның Чогаалчылар эвилелиниң кежигүнү, эмчи Раиса Чүльдүмовна Ховалыг чогаалчыларның чогаалдарынга хамаарыштыр үнелелди берип, ам-даа уругларга шүлүктери удаа-дараа үнүп турарын күзевишаан, бодунуң бичии уругларга бижээни ыры апарган шүлүүн сонуургадып ырлап берген.
Ужуражылганың төнчүзүнде 2 дугаар школаның уругларының чайгы лагериниң удуртукчузу Чодураа Чимий-ооловна солун ужуражылгага келгенинге өөрүп, чогаалчыларга болгаш килдистиң ажылдакчыларынга четтиргенин илереткен.
