А. С. Пушкин аттыг Национал ном саңы Кызылдың хоочуннар бажыңынга Тываның культуразының алдарлыг ажылдакчызы, Россияның композиторлар Эвилелиниң кежигүнү Сергей Бадырааның 75 харлаан юбилейинге тураскааткан «Ындынналган аялгалар чаяакчызы» деп байырлыг ужуражылганы эрттирген. Сергей Ивановичтиң бижээн аялгалары чонга билдингир, ырыларын улуглар-даа, аныяктар-даа бараалгадып чоруурлар. Байырлыг ужуражылга Эдуард Мижиттиң сөзүнге, аялгазы С. Бадырааныы-биле Кызыл хоорайнын ыдык ыры «Кызыл, Кызыл» деп ырыдан эгелээн. Бо ырыны 2012 ч. сентябрь 12-де, төптүң 44 дугаар депутаттар чыыжынга орус болгаш тыва дылга ырлаар кылдыр бадылаан.

Сергей Иванович хоочуннарга бодунуң чогааткан аялгаларының дугайында сактыышкыннарны чугаалап берип, удавас чырыкче үнер ырызын боду күүседип бараалгаан.

Дараазында «Мерген Хемим», «Катап келбес», «Дангына», «Тыва оолга», «Угулзалар» деп ырыларны хоочуннарга улуг экранга сөстерин көргүзүп тургаш, дыңнаткан. «Азас хөлүм», «Авамга» деп ырыларның биидеңнерин кады ырлавышаан сонуургал-биле көргеннер. Хоочуннар бажыңының идепкейжизи Шаңгыр Ондар сөзү Н. Кууларныы, аялгазы С. Бадырааныы «Катап келбес» деп ырыны бараалгаткан.

Композитор Сергей Бадырааның өөнүң ишти Зоя Салчаковна хоочуннар дугайында оюн-баштак шүлүктерни улуг назынныгларга номчуп, кѳрүкчүлерниӊ хөөнүн көдүрген.

Национал ном саңының, Кызылдың хоочуннар бажыңының ажылдакчылары хүндүлүг композитор Сергей Бадыраага юбилейи таварыштыр чылыг күзээшкиннерни чугаалап, суй-белектерни сунганнар. Хоочуннар чараш билир ырларын ырлажып, самнап, аянныг дыштанып, болуп эрткен солун хемчег дээш өөрүп четтиргенин илереткеннер.