Чурт-шинчилел чогаалының болгаш национал библиография килдизинге
чогаалга сонуургалдыглар аразынга «Чылыг сөстүң одаа» деп аттыг бөлгүмнүң
ажыдыышкыны болуп эрткен. Ук бөлгүмнү Тыва үндезин культура төвүнүң «Тыва»
ансамблиниң чараш ыры-хөгжүмү- биле эгелээн.
Бөлгүмнүң ажыл-чорудулгазы кандыг янзылыг
болурун килдистиң удуртукчузу Елена Михайловна
кысказы-биле чугаалап, идепкейлиг чыглып келгеннерге өөрүп, байырны
чедирген. Ол ышкаш килдистиң ажылдакчызы
Буяна Иргит сорулгаларын, чыл дургузунда
кылып чорудар планын таныштырган.
Филология
эртемнериниң кандидады, Тываның гуманитарлыг болгаш социал-экономиктиг тускай
шинчилелдер институдунуң эртем ажылдакчызы Н. Ч. Серээдар ажыктыг сүмелерин
берип, бодалдары-биле солушкан. Дараазында Тыва Республиканың Улустуң
чогаалчызы, “Шын” солуннуң журнализи Ш. М. Суваң, “Тыва мотиватор” солуннуң
корреспонтентизи Ю. С. Донгак, Кызылдың № 2 школазының тыва дыл, чогаал башкызы
У. Б. Севекпит, Бай-Хаак суурнуң “Челээш” уруглар садының кижизидикчи башкызы
Ч. С. Оюн, Кызылда билдингир аныяк чурукчу Е. В. Оюн ажыттынган бөлгүмге, ооң
кылып чорудар хемчеглеринге хамаарыштыр үнелелдерин бергеннер.
Келген аалчылар бөлгүмнүң ажыдыышкынын сонуургап,
янзы-бүрү сонуургаан айтырыгларны салып,
солун, ажыктыг хемчеглер болур-дур
дээрзин демдеглеп, чедиишкиннерлиг болурун күзээн.
