Бөгүн А. С. Пушкин аттыг Национал ном саңынга композитор, Тыва АССР-ниң культуразының, РФ-тиң культуразының болгаш уран чүүлүнүң алдарлыг ажылдакчызы Саая Мыңмырович Бюрбениң 100 харлаанынга тураскааткан «Даглыг черниң ыраажызы» деп сактыышкын кежээзин уран чүүл база чурт-шинчилел килдистериниң ажылдакчылары эрттиргеннер.
Кол чалаттырган аалчывыс алдарлыг композиторнуң оглу Сайгын Бюрбе адазының дугайында чылыг сактыышкыннарны чугаалап, «анаа олуруп алган органын көрбээн мен, ыяап-ла бир-ле чүүлду кылган турар кижи» деп чугаалады. Ачазынга улуг чөлеңгииш болуп, ажыл-ижинге кол деткимчени көргүзүп чораан авазы Роза Туматовнаны база сактып чугаалаан.
Тыва Республиканың культуразының алдарлыг ажылдакчызы, Кызылдың уран чүүл училищезиниң башкызы Зоя Идам-Сюрюн С. Бюрбениң хол-биле бижээн ноталарын көргүзүп, композиторнуң чуруктарын библиотеканың шыгжамырынче дамчыдып берген.
Композиторнуң ырыларын, ажылдап чораан үелерин Тыва Республиканың алдарлыг артизи, «Чечек-Саяннар» ансамблиниң хоочуну Вероника Чооду солун чугаалап база ооң ырыларын бараалгаткан. Сергей Пюрбюнуң сөстеринге чогаатканы «Айлаң кужум» деп ыры Вероника Алексеевнаның аныяк үелеринден тура үргүлчү ырлап чоруур ынак ырызы.
«Чырык күзел» ансамблиниң хөгжүмчүлери С. Бюрбюнүң дараазында ырыларын аянныы кончуг ырлааннар: «Күш-ажылга мактал», «Суурумга чанып кээр мен», «Дамчыт салгын», «Малчын угбамга», «Мөңге назын», «Өртемчейни өргүзүмзе».
Саая Мынмырович чурттап эрткен үезинде хөй-хөй аялгаларны чогаадып, бодунуң балалбас изин арттырган. Ооң допчу-намдарын, бижээн аялгаларын, ырыларын улуг-биче чонга делгередип, сактып, ырлажып чорууру дээрге-ле алдарлыг ыраажының төөгүзү төнчү чок дээрзин бадыткап турар.
