А. С. Пушкин аттыг Национал ном саңынга Тыва Республиканыӊ Улустуӊ артизи, Россия Федерациязыныӊ алдарлыг артизи, ыраажы, режиссер Анзат Шожал-Доржуевна Кууларнын юбилейлиг чылынга тураскааткан «Чуртталга – театр, хөгжүм - ынакшыл» деп байырлыг ужуражылга болуп эрткен. Номчукчуларга Анзат Кууларның допчу намдарын таныштырып, ооӊ төрээн суурунга ынакшылын илереткен шүлүктээн солун видеозун көргүзүп, шиилерге ойнаан овур-хевирлеринден кыска үзүндүлерни экран таварыштыр ном саңының ажылдакчылары көргүскеннер.

Ол тыва театр уран чүүлүнге, 50 ажыг чыл дургузунда ажылдап келген үелеринде, таварышкан солун ужуралдарын номчукчуларга сонуургаткан. Ооң аныяк чораан үелеринде театр артисттери бо-ла кожууннар, суурларже үнүүшкүннер кылып чоруур турган. Ол чораанда орукка кандыг-даа таварылгалар турарын база сактып чугаалаан.

Номчукчулар артистке сонуургаан айтырыгларын удаа-дараа салганнар. Ном саңының хоочуну Марина Монгуш К. Сагдыныӊ «Кыстыӊ оруу» деп шиизиниӊ бир ролюнга ойнаанын онза сактып чугааланган.

Анзат Куулар шиилерге ойнаар, ырлаарындан аӊгыда, чырыкче «Өрү тырткан чонумайны, өпейленген театрымны» деп номну үндүрген. Ында театрга ажылдап, чурттап эрткен солун сактыышкыннарын номчукчулар-биле үлешкен.

Хүндүлүг артизивис Анзат Шожал-Доржуевнага юбилейлиг чылы-биле байыр чедирип, быжыг кадыкшылды, чогаадыкчы ажыл-ижинге чедиишкиннерни күзедивис.