Чылдың-на, май 27-де, бүгү Россияга ном саңының хүнүн 1995 ч. профессионал байырлал кылдыр демдеглээрин, ол үеде РФ-тиң Президентизи Б. Н. Ельцин чарлыкты үндүрген.

Ном саңы – эртем-билигже орук изээриниң үндезин дөзү. Ооң ужур-дузазы кайгамчык. Ол силерниң өңнүүңер, сүмелекчиңер, дузалакчыңар. Ниитилелге, кижиниң угаан-медерелиниң сайзыралынга, чаа-чаа ажыдыышкыннарже базымны кылып, чедиишкиннерже чайгаар идигни бээр, бир-ле солун оранче сени үдеп кииргеш, янзы-бүрү мергежилдиң кандыг-даа аажы-чаңныг кижилери-биле ужураштырып, сагыш-сеткилди доюлдурар, чырыдар, бурунгаар чүткүлдүүн оттурар. Оон үе, чада аайы-биле аңгы-аңгы чоннарның эрткен оруктарының төөгүзүн, амыдырал-чуртталгазын, ажыл-амыдыралын, каас-шиник бойдузун тып, номчуп, билип алыр аргалыг.

Ном саңының хүнү-биле силер бүгүдеге өг-бүлеңерге өөрүшкү-маңнайны, ажыл-ижиңерге, тывызыксыг, хуулгаазын болуушкуннар үзүлбес болурун йөрээп, кол чүүл кадык-чаагай амыдыралды күзедивис!

Хүндүткел-биле,
ТР-ниң А. С. Пушкин аттыг ном саңының удуртукчузу И. Эртине


Төттүнмес хөй чогаалдарның
Дөгерезин бүрүн шыгжаан,
Эрткен төөгү эртинелиг
Эвирилбес ном саңы.

Эртем-билиг чажыттарын
Эдериштир эде салган,
Каталогта чыып, немээн,
Хандыр шилиир даңзы ында.

Өзек дөзү шыгжамырлыг
Өртээ турбас үүжелиг,
Өөредиг, билиг чүмнээр
Өртээл одаа ном саңы.
(И. Ооржак)