Тураскаалдыг номнар килдизинде ыдыктыг, чараш байырлалывыс Шагаага тураскаадып, «Шагаа – сүзүглелдиг байырлал» деп номнар делгелгези салдынган. Ында Шагааны үе-дүптен тыва чонувустуӊ эрги чылды үдеп, чаа чылды уткуур езулалдарыныӊ, оюн-тоглааларыныӊ, аас чогаалыныӊ дугайында номнарны делгээн.

«Шагааныӊ дөзү болгаш езу-чаӊчылдары» деп номда орус, тыва дылдарда байырлалдыӊ кол чорудуп эрттирер ужурларын бижээн. Национал идик-хеп, аъш-чем база-ла байырлалывыстыӊ кол хүндүткелдиг каастакчылары болуп турар. Ак чемнеривиске тураскааткан тывызыктар, үлегер домактар «Холу чемзиг авам сөӊү» деп номда бижиттинген.

Делгелгеден А. В. Адриановтуӊ, М. Б. Кенин-Лопсанныӊ, И. У. Самбунуӊ, Г. Н. Курбатскийниӊ бижээни Шагаага хамаарышкан номнары-биле таныжып ап болур силер. Тыва улустуӊ аас чогаалы: тоолдарны, үлегер домактарны, тывызыктарны «Чоннуӊ чечени», «Тыва улустуӊ аас чогаалы», «Тыва улустуӊ тывызыктары» деп номнардан номчуп болур.

Хүндүлүг номчукчулар! Делгелгеде салдынган номнарны сонуургап кээринче чаладывыс!