Совет дайынчылар Ровно дээш тулчуушкунга хөй чидириглиг-даа болза, дайын эгелээнден бээр 1944 ч. февраль 2-ге чедир фашистерге эжелеттирген хоорайны тыва эки турачыларның ачызында хостаан.

Ол төөгүлүг хүннү сактып, январь 5-тиң хүнүнде чурт шинчилел болгаш чогаал килдизиниң ажылдакчылары тыва эки турачыларның Ровно хоорайны хосташканындан бээр 80 чыл оюнга тураскааткан солун хемчегни эрттирген.

Ук хемчегге тыва маадырларның эрес-дидимин, кажар арганы ажыглап, фашистерге билдиртпейн станцияга чоокшулап келгеш, хенертен дидими-биле халдап киргениниң дугайында номчукчуларга сонуургаткан. Тываның эрес-дидим оолдар-кыстарының канчаар тулчуп, тыва чоннуң Ада-чурттуң Улуг дайынынга дузалажып чораанының дугайында видео-материалды хемчегге келген улуг-биче номчукчулар аажок улуг сонуургал-биле көрүп, дыңнааннар.