Тыва Улустуң чогаалчызы, шүлүкчү, драматург, прозачы, очулдурукчу, Россияның Чогаалчылар болгаш театр ажылдакчыларының Эвилелдериниң кежигүнү Эдуард Баирович Мижиттиң чок болганынга Тыва Республиканың А. С. Пушкин аттыг Национал ном саңының мурнундан ооң тɵрээн болгаш чоок кижилеринге ханы кажыыдалды илередип тур.

Эдуард Баирович 1961 ч. апрель 22-де Улуг-Хемниң Торгалыг суурга төрүттүнген. А. М. Горький аттыг литература институдун дооскан. Тываның ном үндүрер черинге база «Улуг-Хем» сеткүүлүнге үр үеде редакторлап, «Тываның аныяктары» солуннуң кол редактору болуп, В. Көк-оол аттыг хөгжүм-шии театрының литературлуг килдизинге эргелекчилеп, Тыва Республиканың Чазааның чанында Тываның гуманитарлыг болгаш тускай социал-экономиктиг шинчилелдер институдунуң литература секторунга ажылдап чораан.

Э. Б. Мижит «Кезерниң балдызы» (1990), «Бузундулар» (1992), «Бөдүүн одуруглар» (2006), «Казыргылыг кудуктуң кыйгызы» (2002), «Кара-Дагның казыргызы» (2004), «Туман өттүр отчугаштар» (2010), «Течик», (2012), «Течик – малчын аалда» (2014), «Амыдырал, амыдырал…» (2022), орус дыл кырында «Расколотый миг» (2011), «Кто ты, Субедей-Багатур?» (2019) деп номнарны бижээн.

Ооң шүлүктери төп российжи солун-сеткүүлдерге, чыындыларга хөйү-биле парлаттынган. Чогаалдары орус, англи, француз дээш оон-даа ɵске дылдарже очулдуртунган.
Э. Мижит тыва дылче А. Пушкинниң, А. Чеховтуң, А. Островскийниң, В. Шекспирниң, М. Тикамацунуң, Р. Томаның, Л. Бернстайнның, Э. Понуң болгаш оон-даа өске чогаалчыларның чогаалдарын очулдурган. «Чиргилчиннер», «Кым сен, Субедей-Маадыр?», «Өргүл», «Кара-Дагның казыргызы» дээш оон-даа ɵске шиилерни Тываның В. Ш. Көк-оол аттыг хөгжүм-шии театрының сценазынга тургускан.

Эдуард Баирович Мижиттиң чырык овур-хевири, уран-чечен чогаалдары чоннуң сагыш-сеткилинге кезээ мɵңгеде артар.