Анатолий Сергеевич Серен – база бир онзагай, көскү кижилериниң бирээзи, ону билбес кижи ховар, салым-чаяанныг, хөй талалыг режиссёр, журналист, удуртукчу дарга, башкы, спортсмен, Тыва Республиканың уран чүүлүнүң алдарлыг ажылдакчызы чораан.

Ол 1948 ч. август 28-те Кызыл хоорайга төрүттүнген. Кызылдың 2 дугаар школазын чедиишкинниг дооскаш, 1968 ч. Луначарский аттыг ГИТИС-тиң аспирантуразын база билиг-мергежилин улам-на бедидип алыры-биле Комсомолдуң дээди школазының журналистика салбырын, Чөөн-Сибирьниң күрүнениң культура инстутудун, Москваның күркино университедин дооскан.

Анатолий Сергеевич хөй чылдар дургузунда, уран чүүлге чайгылыш чок бараан болуп келген. Ол янзы-бүрү удуртур ажылдарга: Бии-Хем райкомунуң, Тыва обкомунуң секретарынга, Тываның телерадиокомпаниязынга, парлалга Комитединиң даргазынга, театрга кол режиссёрлап, удуртукчулап, ол ышкаш бодунуң кызымак чоруу-биле Амгы үениң гуманитарлыг институдун ректорлап ажылдаан. Оон ыңай Москвага Россияның Эртемнер академиязының бойдус эртемнериниң Холодинамика институдунуң директорунга база ажылдаан. 1980 чылдарның эгезинде Тываның сайыттарының аразындан эӊ-не аныяк сайыт болуп, культура яамызынга томуйлаткан. Культура сайыдынга ажылдап турган үелеринде «Эң-не дээре культура сайыды» деп бедик атка төлептиг болган. Ооң кандыг-даа кижи-биле чугааны кылып, чону хаара тудуп, башкарар салым-чаяаны онзагай турган. Удуртур ажылдардан аңгыда, Анатолий Серен – чарлакчы, ыраажы, шүлүкчү, депутат, делегат. Мындыг салым-чаяан кижи бүрүзүнге турбас дээрзи билдингир.

Анатолий Серенниң сагыш-сеткили байлак, билдингир болгаш тодаргай чугаа-сооду-биле кижиниң кичээнгейин чайгаар-ла хаара тудуп, чугаалажыр арганы үндүрүп кээр. Бергелерге торулбас, амыдыралга тура-соруктуг, туруштуг, чүткүлдүг кижи дээрзин чон билир.

Анатолий Серен спортка база хандыкшылдыг чораан. Ол стол теннизинге ойнаар талазы-биле эң-не шыырак, мергежээннерниң бирээзи, Тываның 18 дакпыр чемпиону. 30 ажыг чылдар иштинде теннис Федерациязының бедик категориялыг кол шииткекчизи болуп, хөй-хөй Россия чергелиг маргылдааларны эрттирип, аныяктарны хаара тудуп, Тывага теннис оюнун сайзырадырынга улуг үлүг-хуузун киирген.

«Мен бодумну дыка-ла аас-кежиктиг кижи дээр мен. Чүге дээрге амыдыралымның оруктарынга мени долгандыр кайгамчык солун кижилер-биле ужуражып, оларның арга-сүмезин дыңнап, а чамдыкта чемелиг, анчыг сөстерин-даа дыңнаар чордум. Меңээ кижи бүрүзү дөмей, менден өске уткалыг бодалдарлыг-даа болза, ол кижилерни дөмей-ле хүндүлээр мен…» деп, А. Серен чугаалап турган.

Ол 2019 ч. июль12-де мөчээн.

Материалды И. Д.Ооржак белеткээн.