Июль 27-де Национал ном саңының абонемент килдизиниң ажылдакчылары хоочуннар бажынынга аныяк чогаалчы Саргылана Валерьевна Саая-биле солун ужуражылганы эрттирген.
Саргылана Саая чүгле чогаалчы эвес, ол «Орай күзел» деп тыва кинонуң кол режиссеру. Амгы үеде кады чурттаан эжиниң быжыг чѳлеңгиижи, үш ажы-тѳлүн кижизидип, ѳстүрүп чоруур үлегерлиг ава.
Хоочуннар Саргылана Валерьевнаның допчу намдарын, чогаадыкчы ажыл-ижин аажок сонуургап, Турцияга ѳѳренип чораанын кичээнгейлиг дыңнап, хѳй-хѳй солун айтырыгларны салып, аныяк авторга чогаал делегейинче ам-даа ханы шымныгып кирерин күзээннер.
Аныяк чогаалчының «Орай күзел» деп тыва кинозунуң үзүндүзү ужуражылганы каастаан. Хоочуннар кинону улуг сонуургал-биле кѳргеннер.
Ужуражылга чылыг сактыышкын бооп артып каары-биле, Саргылана Саая «Чогаалымдан тѳѳгүп берейн» деп номун хоочуннар бажынынга белекке берген.
