«2023 чыл – Россияда башкының болгаш дагдыныкчының чылы». Бо чылга тураскаадып, «Тыва дылдың кадагалакчылары» деп шөлчүгешти республиканың тыва дыл башкыларының ассоцияциязындан 18 башкыны чалап алгаш, Национал ном саңынга солун мөөрейни эрттирген. Мөөрейге Б. И. Араптан аттыг Сукпак, Туран база Кызыл хоорайның аңгы-аңгы школаларындан башкылар келгеннер. Шөлчүгешти Тыва Республиканың улустуң артизи Мерген Хомушку А. Даржайның «Тыва дылым» деп шүлүүнүң күүселдези-биле ажыткан. Ассоцияцияның удуртукчузу башкы, шүлүкчү М. Н. Ооржак байыр чедирип, сөстү чугаалаан.

Башкылар 2 аңгы бөлүк болуп алгаш, 4 кезектен тургустунган «Тыва дылдың кадагалакчылары» деп мөөрейге киришкен. Мөөрейниң кезектериниң аттары: Литературлуг оюн, Логиктиг оюн, Кроссворд, А. Даржайның бижээни «Тыва дылым» деп шүлүүнге аялганы чогаадыры.

Мөөрейниң шииткекчилери: эртем ажылдакчызы, филология эртемнериниң кандидады Н. Ч. Серээдар, Тыва Республиканың чогаалчылар Эвилелиниң даргазы С. М. Өндүр, А. С. Пушкин аттыг ном саңының редактору О. О. Момбулай болганнар. Оюннуң киржикчилеринге «Айвори» аттыг салон-ателье даараныкчылары, доозукчу уругларга тааржыр кежээки, чараш платьелерниң көрүлдезин кылган. Дараазында шоколадтың аңгы-аңгы амданнарын таныштырары-биле мастер-классты база эрттирген.

Түңнелинде 1-ги черни «Челээш», 2-ги черни «Өлчейлиг» деп бөлүктер алганнар.Тиилекчилер хүндүлел бижиктерниң, чигирзиг белектерниң ээлери болган.

Оон ыңай Национал хөгжүм-шии театрының чогаал болгаш драматургия адырының редактору К. Коңзай, Тываның күрүне университединиң доозукчузу, ыраажы А.-Б. Ооржак кежээни улам-на каастааннар.