Күш-ажыл
кижини каастаар
Маадырлыг
ажыл-ижи-биле чурттуң төөгүзүнге, чоннуң сеткил-сагыжынга балалбас исти
арттырган Социалистиг Күш-ажылдың маадыры деп хүндүлүг аттыӊ эдилекчизи Монгуш Чола Допур-оолович – Тыва
АССР-ниң Чөөн-Хемчик кожууннуң Чыраа-Бажы совхозунуң алдарлыг малчынны чораан.
Ол
1918 ч. май 1-де малчын араттың өг-бүлезинге төрүттүнген. Бичиизинде-ле малчын
ада-иезинге дузалажып, анай-хураган ытчып, хой бажы дозуп, кылынмазы чок, орлан,
эрес, кежээ оол бооп өзүп келген.
1950
ч. эгелээш, боду аңгы кодан хойну хүлээнип алгаш, кадарчының чымыштыг ажылынче
кирипкен. Ийи чыл эрткенде Чола Монгуштуң коданында мал бажы өзүп, 100 баш
төрүүр хойдан 109 хураганы онча-менди камгалап алган. Оон эгелээш-ле, хойжунуң
чылдың-на хураганнар саны көвүдеп (112-115), көргүзүглери оранчок бедик
деңнелче үнүп, мурнакчылар одуруунга санадып эгелээн.
1965
ч. Чола Допур-оолович Тыва АССР-ниң алдарлыг малчыны деп атка төлептиг болган. Күрүнеге
малдың баш санын өстүрер планын ажыр
күүседип, эң-не бедик көргүзүглерни чылдың-на чедип ап чорууру дээш, 1966 ч. Социалистиг
Күш-ажылдың маадыры деп аттың эдилекчизи болбушаан, Ленин орденин база алган. Тайбың
ажыл-ишке маадыр болуп, дээрелерниң дээрези диртип, ат-алдарга бүргедири – улуг
аас-кежик. Эки кылган ажыл, элеп читпес алдар!
Чола
Допур-оолович 1989 ч. мөчээн.
