Тыва Республиканың алдарлыг ажылдакчызы,  шүлүкчү, журналист, очулдурукчу Артур Ойняр-оолович Хертектиӊ 60 харлаан оюнга таварыштыр номнар делгелгезин национал болгаш чурт-шинчилел чогаалыныӊ килдизинде салган.

Хертек Артур Ойняр-оолович 1963 ч. январь 10-да Бай-Тайга кожууннуӊ Тээли суурунга тɵрүттүнген. 1981 ч. Кызылдыӊ 2 дугаар ортумак школазын, Кызылдыӊ күрүнениӊ башкы институдунуӊ тыва дыл болгаш чогаал салбырын дооскан.

Школачы тургаш-ла «Тываныӊ аныяктары» солуннуӊ чанында «Дамырак» чечен чогаал каттыжыышкынныӊ кичээлдеринге барып, чогаал талазы-биле баштайгы билиглерни алган. Авторнуң шүлүктери «Шын», «Тываның аныяктары» солуннарынга, «Улуг-Хем» альманагынга, проза чогаалдары «Дамырак» деп чыындыга парлаттынгылаан.

А. Хертектиң шүлүктери «Сарынналдыӊ ырлары» деп ат-биле өске үш авторларның шүлүктериниң «Өзүмнер» деп ниити чыындызынга 1990 чылда үнген. Авторнуң «Чуруттунуп артып кагды», «Күскү көрүштү», «Манаашкын», «Өлүм», «Өлген хава чанынга бодал», «Чигзинигниң чылдарында» дээш, оон-даа өске шүлүктери кижи бүрүзүн дүвүредип, арын-нүүрүн оттуруп турар. Ол ышкаш Тывага 1930-1950 чылдарда болуп турган политиктиг репрессия темазын база чырыткан. 

Артур Ойняр-оолович тыва дылче Франческо Петрарканың, М. Горькийниң, Джеймс Тёрбертиң, Эдуард Русаковтуң, Анатолий Шкоркинниң болгаш оон-даа өске чогаалчыларның чогаалдарын очулдурган.

Артур Ойняр-оолович Тываның чазаанының албан черинге, Тыва Республиканың Президентизиниң секретарынга, «Тываныӊ аныяктары» солуннуӊ килдис эргелекчизинге, харысаалгалыг секретарынга ажылдап чораан, хɵй чылдар иштинде «Шын», «Улаачы» солуннарының корреспондентизинге, Ю. Ш. Кюнзегеш аттыг тываның ном үндүрер черинге директорлап, шаӊнал-макталдыг ажылдаан.

Хертек А. О. Россияның журналистер, Тываның чогаалчылар эвилелдериниң кежигүнү.