Тыва Республиканың А. С. Пушкин аттыг Национал ном
саңынга композитор Василий Монгуш Кара-оолович “Ава чүрээ” деп ырылар чыындызын
белекке берген.
Ол Улуг-Хем кожууннуң Ийи-Тал сумузунга 1958 ч. февраль 14-те төрүттүнген. Школачы чылдарында-ла уран чүүл көрүлделеринге
идепкейлиг киржип чораан болгаш школа соонда Кызылдың уран чүүл училищезиниң
баян салбырынче өөренип кирип алган.
Уран чүүл училищезин чедиишкинниг дооскаш, Ийи-Тал сумузунуң көдээ
культура бажыңынга ажылдай берген. 1995 ч. сентябрь 1-де В. К. Монгуш
Улуг-Хем кожууннуң Хайыракан сумузунуң уругларның уран чүүл школазының
директорунга томуйлаткан.
Василий Монгуш өске хөгжүмчүлерден бир аңгы, тускайлаң
үннүг композитор. Ооң онзагай чүүлү – бодунуң бижээн сөстеринге ырының аялгазын
бижип чорууру.
Василий Кара-оолович Монгуш “Улуг-Хем кожууннуң Хүндүлүг
хамаатызы” деп аттың эдилекчизи, Тыва Республиканың композиторларынның
чогаадыкчы эвилелиниң кежигүнү.
Екатерина Кыргысовна Сааяның бижээн шүлүктеринге Василий
Кара-оолович Монгуштуң чогааткан ырыларындан тургустунган “Ава чүрээ” деп
чыынды композиторнуң дөрткү ному болуп турар.
