А. С. Пушкин аттыг Национал библиотеканың күрүне библиографиязының
секторунда Арыяа Араптановна Алдын-оол аттыг Кызылдың ийи дугаар школазының эге класс башкызы Сарыглар Ольга
Кужугетовнаның чыып үндүргени "Тывызыкты тыппышаан өөрениили" деп өөредилге-методиктиг ному келген.
Сарыглар, О. К. Тывызыкты тыппышаан өөрениили : эге шк. 1-4 кл.
өөреникчилеринге база башкыларга эртем-өөредилгелиг пособие / О. К. Сарыглар ;
лит. ред. Л. Х. Ооржак. – Кызыл, 2022. – 44 ар. : чур.
Номнуң кол сорулгазы тыва чоннуң аас чогаалы тывызыктарны башкылар ажыглап тургаш өөреникчилерни өөредиринге, а уругларга тывызыктарының чеченин болгаш чаражын билип, хүндүлеп чоруурунга өөренип алыр кылдыр салдынган.
Бо номда чүгле тывызыктар тыварында эвес, сөс курлавырын байыдары,
үн-үжүктү шын адап, ылгап өөредири көрдүнген. Чуруктарның дузазы-биле шын чугаа
тургузар, дүрген-чугаалар уругларның
дылын чугаага эптештиреринге ажыктыг боор деп автор санап турар. Ном башкыларга, ада-иелерге дузаламчы болур
болгаш уругларга тыва дылын эки билип алырынга ажыктыг.
“Кандыг-даа чон бодунуң культуразын, дылын, төрээн чериниң төөгүзүн билип,
өөренип алырының эге дөзү школа болганда, бо номну башкылар болгаш өөреникчилер сонуургаар боор”
– деп автор идегелин илереткен.
Ольга Кужугетовнаның хөй чылдар иштинде чыып кылган бо ажылынга номчукчулар
бедик үнелелди бээринге библиотеканың ажылдакчылары база идегеп турар.
Г. М. Комбу, күрүне библиографиязының секторунуң эргелекчизи.
