Декабрь 10-да А. С. Пушкин аттыг Национал ном саңының национал болгаш чурт-шинчилел чогаалының килдизинде Тываның Улустуң чогаалчызы Черлиг-оол Чашкымаевич Кууларның 80 харлаан оюнга «Таалыңда чогаалдар» деп номнар делгелгезин кылган. Ында чогаалчының бижээн номнарын база ооң очулдурган чогаалдарын, шүлүктерин делгей салган.

Черлиг-оол Куулар 1940 чылдың декабрь 10-да Чɵɵн-Хемчик кожууннуң Хорум-Дагга тɵрүттүнген. Суг-Аксы ортумак школазын дооскаш, Кызылда күрүнениң педагогика институдун дооскан.

Чогаал ажылын 1960 чылда бижип эгелээн. Баштайгы ному «Аъдым» 1975 чылда үнген. Дараазында: «Үе» (1978), «Хаяа», «Сугда даштар», «Дүвүлүг дүн» (2000), «Мээң дагларым» (2003), «Чалбыыш ɵттүр» (2005) деп шүлүктер чыындылары база «Даглар аялгазы», «Аялга», «Үер халап сөөлүнде» деп проза номнары үнген.

Ооң номнары моол, хакас, алтай, украин дылдарже очулдуртунган. Ол С. Есенинниң, А. Пушкинниң, К. Симоновтуң, М. Кильчичаковтуң, С. Козлованың шүлүктерин, М. Варфоломеевтиң «Кɵжегелер», Т. Сметанинниң «Лоокут биле Нюргухун» деп шиилерин тыва дылче очулдурган.

Чогаал ажылындан аңгыда, Ч. Куулар тыва аас чогаалынга хамаарыштыр эртем ажылын кылып, элээн каш ажылдарны бижээн, «Кыс-Халыыр» деп тоолчургу чугаалар номун үндүреринге киришкен.
Ч. Ч. Куулар ССРЭ-ниң Чогаалчылар эвилелиниң кежигүнү чораан. Тыва Республиканың Улустуң чогаалчызы, «Күш-ажылчы шылгарал дээш» деп медальдың эдилекчизи.