Ирбижей Чечен Бай-Караевич

Чечен Бай-Караевич Ирбижей 1942 чылдың июнь 12-де Улуг-Хем кожууннуң Баян-Колга төрүттүнген.

Кызылдың 2 дугаар ортумак школазын, Москвада М. Горький аттыг литература институдун дооскан.
Ажылчын базымын Таджикистанда Вахш шынаазында геология экспедициязындан эгелээн. Баян-Колга малчыннап, трактористеп, Терлиг-Хаяның мөңгүн суу болбаазырадыр бүдүрүлгезинге, Тыва-кобальт комбинадынга чер өрүмнекчизи болуп ажылдап чораан. 1986 чылдан эгелеп, журналистика ажылынче шилчээн. «Тываның аныяктары», «Деткимче», «Таңды-Уула» солуннарынга корреспондентилеп турган.
Шүлүкчү болгаш прозачы.
1962 чылдан эгелеп, ооң шүлүктери республика солуннарынга, «Улуг-Хем» сеткүүлүнге парлаттынып эгелээн. «Литературная Россия» солунга парлаттынган «Частыышкын» деп чогаалында чүгле даг ажылының дугайы эвес, кижилер аразының харылзаазы үе-үелерде канчалдыр өскерлип, тигленип, чарлып турарын философчу бодал-биле, бойдустуң аразында харылзаазын уран-чечени-биле көргүскен. 2008 чылда «Ноян таңмазы» деп тоожузу үнген.
Ч.Б. Ирбижейниң лириктиг шүлүктери философчу ханы уткалыы-биле номчукчунуң сонуургалын хаара тудуп турар.
Россияның Чогаалчылар эвилелиниң кежигүнү.