Июнь айның 27 бүгү Россияда база бир өөрүнчүг хүннерниң
бирээзи болуп турар. Ол дээрге аныяк өзүп олурар салгалдарывыстың байырал хүнү.
Аңаа уткуштур А. С. Пушкин аттыг ном саңының
ажылдакчылары Тываның шериг комиссариадынга шериг албанын эрттиреринче кыйгырткан
оолдарга «Ном саңы – аныяктарга» деп солун акцияны эрттирген.
Төөгүден ап кээр болза, Аныяктар хүнүн мурнунда чылдарда
июнь айның сөөлгү улуг-хүнүнде байырлап эрттирип турган. 1993 чылдан эгелеп
президентиниң Чарлыы-биле Июнь 27-ниң хүнүн – Аныяктар хүнү кылдыр бадыткаан.
Аныяктар – чурттуң келир үези. Үе аайы-биле аныяктарның көрүжү, сонуургалы болгаш аажы-чаңы өскерлип турар. Ынчалза-даа кандыг-даа эртем-билигниң дөзү номнарда дээрзин утпас болза эки. «Эртинени черден казар, эртемнерни номдан тывар» деп тыва улустуң үлегер домаа безин ону бадыткап турар. Номчуттунарга кижиниң угаан-бодалы сайзыраар, чечен-мерген болур болгаш дылы сайзыраңгай болур. Ынчангаш бистер, ном саңының ажылдакчылары база ада-иелер, башкылар аныяк өзүп олурар салгалдарывысты эки орукче угландырып, хөй номчуттунуп, өөренип, боттарын сайзырадыр кылдыр углап-баштаар ужурлуг бис.
Акцияның кол сорулгазы – аныяктарны номчулгаже хаара
тудары, аңгы-аңгы дылдарда чечен чогаалдарны номчуурунче кыйгырары. Шериг албанын
эрттиреринче кыйгырткан элээди оолдар, номчулганың ажык-дузазын сонуургап
дыңнааннар.
Ном саңының ажылдакчылары оон-даа өске «Шилип ал!», «Наркомания:
эгези болгаш төнчүзү» деп фильмнерни көргүскен. Түңнелинде «Номчуттунарга
ажыктыг болгаш эки», «Арага дугайында Хоозун меге болгаш Алыс шын», «Наркотиктерге
«Чок!» деп чугаала!» деп буклеттерни оолдарга тывыскан.
